ພິທີເຊັນສັນຍາລົງນາມຮ່ວມມືເປັນເຄືອຂ່າຍໂຮງຫມໍ
25 April 2024
ໃນຕອນບ່າຍວັນທີ 23 ເມສາ 2024 ທີ່ ໂຮງຫມໍເຊດຖາທິຣາດ ໄດ້ຈັດພິທີເຊັນສັນຍາລົງນາມຮ່ວມມືເປັນເຄືອຂ່າຍໂຮງຫມໍ ລະຫວ່າງ ໂຮງຫມໍເຊດຖາທິຣາດ ແລະ ບໍລິສັດ ເອັສທີ-ເມືອງໄທ ປະກັນໄພ ຈໍາກັດ. ໂດຍການເຂົ້າຮ່ວມເປັນປະທານ ໂດຍ ທ່ານ ດຣ ຫວັງນະຄອນ ດິດຕະພົງ ຜູ້ອຳນວຍການໃຫຍ່ ໂຮງໝໍເຊດຖາທິຣາດ ແລະ ທ່ານ ຊານໄຊ ພົມສຸວັນ ຜູ້ອໍານວຍການໃຫຍ່ ບໍລິສັດ ເອັສທີ-ເມືອງໄທ ປະກັນໄພ ຈໍາກັດ ເພື່ອຮ່ວມລົງນາມເຊັນສັນຍາບັນທຶກຂໍ້ຕົກລົງຮ່ວມມືທາງດ້ານເຄືອຂ່າຍໂຮງໝໍເພື່ອໃຊ້ໃນການບໍລິການ ການປິ່ນປົວຮັກສາໃຫ້ກັບລູກຄ້າຂອງ ບໍລິສັດ ເອັສທີ-ເມືອງໄທ ປະກັນໄພ ຈໍາກັດ ໂດຍບໍ່ຕ້ອງສຳຮອງຄ່າໃຊ້ຈ່າຍ (Cashless Service).
ເຊິ່ງປະຈຸບັນລູກຄ້າຂອງ ບໍລິສັດ ເອັສທີ-ເມືອງໄທ ປະກັນໄພ ຈໍາກັດ ສາມາດໃຊ້ສິດປິ່ນປົວຮັກສາໃນຖານະຜູ້ປ່ວຍທີ່ນອນໃນໂຮງໝໍ (IPD) ຂອງໂຮງໝໍຊັ້ນນຳໃນ ສ ປ ປ ລາວ ແລະ ອີກຫຼາຍກວ່າ 353 ໂຮງໝໍເອກະຊົນໃນປະເທດໄທ ໂດຍບໍ່ຕ້ອງຊໍາລະຄ່າໃຊ້ຈ່າຍລ່ວງໜ້າ (ວົງເງິນ) ຄຸ້ມຄອງຜ່ານບັດ ‘‘ST-MTI Health Card’’.
ກິດຈະກຳດັ່ງກ່າວເປັນພຽງສ່ວນໜຶ່ງຂອງການພັດທະນາ ແລະ ຍົກລະດັບສະຫວັດດີການທາງສຸຂະພາບໃຫ້ກັບປະຊາຊົນໃນ ສ ປ ປ ລາວ ເພື່ອຮອງຮັບຄວາມຕ້ອງການດ້ານການປິ່ນປົວຮັກສາທີ່ມີຫຼາຍຂຶ້ນໃນປະຈຸບັນ ເຊິ່ງ ບໍລິສັດ ເອັສທີ-ເມືອງໄທ ປະກັນໄພ ຈໍາກັດ ຢູ່ໃນລະຫວ່າງການສຶກສາຜະລິດຕະພັນໃໝ່ທາງດ້ານສຸຂະພາບທີ່ໃຫ້ຄວາມຄຸ້ມຄອງສູງຂຶ້ນຈາກປະຈຸບັນ.
